Uppliv søguna um Ova Joensen og tiltikna bragdið tvørtur um Norðuratlantshavið

Ovasavnið í Nólsoy er savn um lívið og serstøku søguna hjá Ova Joensen, sum gjørdist fólkahetja, tá ið hann í 1986 róði einsamallur úr Nólsoy til Keypmannahavnar. Eftir tvær miseydnaðar royndir legði Ove aftur til havs við Dianu Victoriu og náddi á mál eftir meira enn 40 dagar á sjónum.

Á savninum stendur Diana Victoria sum miðdepil í framsýningini, har søgan um Ova verður borin fram við søgu, ljóði og ljósi. Sjálvt savnið er íblást av føroyska bátasniðnum, og har er eisini kafé, har vitjandi kunnu fáa sær ein drekkamunn, meðan tey uppliva søguna um ein av kendastu føroysku ævintýrarunum.