Ein friðsæl løta við hita og køldum kørum mitt í Havn.

Vælveruøkið er ein avbyrgdur partur av Svimjihøllini í Gundadali. Atgongd fæst við serstøkum armbandi, sum letur dyrnar upp til økið.

Her kanst tú veruliga koma niður í ferð. Set teg í heita hylin, njót gosbaðið ella lat dampbaðið loysa upp í kroppinum. Í hitarúminum kanst tú fáa hitan í kroppin, meðan føroyska veðrið livir sítt egna lív uttanfyri.

Far út undir opnan himmal, har tvey kør og eitt hitarúm bíða. Set teg væl til rættis í heita karinum, ella far eitt skjótt og frískligt dypp í tað kalda. Skift millum hita og kulda, steðga á eina løtu og njót friðin mitt í Tórshavn.